“Hinay-hinay apan kanunay.”

Mao kini ang saad nga gipanumpaan sa bag-ong pangulo sa Regional Development Council (RDC) nga si Bohol Governor Erico Aristotle Aumentado.

Matud ni Aumentado, atol sa gihimong interview sa mga sakop sa media, ang turismo sa probinsiya sa Bohol mibalik na susama kaniadto sa wala pa ang pandemiya sa Covid-19.

Dugang niya nga ang turismo sa Bohol naghinayhinay na og bangon ug gilauman nga mas mosaka pa kini sa mga mosunod nga mga buwan.

“Nibalik na human sa pandemiya sa Covid ug niagi pa gyud ang bagyong Odette,” matud ni Aumentado.

Dugang ni Aumentado nga siya ug ang pipila ka mga opisyal sa Kapitolyo nilarga sa South Korea nga kabahin sa ilang paninguha nga makakaplag pa og dugang turista sa Bohol.

“We will fortify our tourism. We just came from South Korea where our tourism officials talked to their counterparts,” dugang niya.

Dako ang iyang kalipay kay miresulta kini og maayong balita kon diin sa ilang pag-adto moabot sa 10,000 ka mga Koreano ang gilauman nila nga mobisita sa probinsiya sa Bohol sugod sa sunod buwan apan dili lang magdungan gikan sa Disyembre 2022 hangtod na sa bulan sa Pebrero 2023.

Ang probinsiya sa Bohol naila sa puti nga beaches, Chocolate Hills lakip na ang mga tarsier ug nagkalainlain pa nga mga makasaysayanong bahandi ug abunda sa kulturanhong mga kabilin.

“Mobisita sila dinhi sa Bohol lakip na usab sa probinsiya sa Sugbo ug uban pa nga mga lugar sa Central Visayas kon asa sila malingaw,” dugang ni Aumentado. (BBT)