MGA umento sa minimum nga mga suholan sa Central Visayas maghuwat na lang hangtod sa Enero 5, 2020 sa pagsugod og epekto sa adjustments sa ilang mga suholan.

Kini human ang National Wages and Productivity Commission (NWPC) niingon nga ang Wage Order No. ROVII-22 sa Central Visayas wage board moepekto sa Enero 5, 2020.

“The minimum wage increase in Central Visayas was published at The Freeman last December 21, 2019 and will be in effect starting January 5, 2020,” matod sa NWPC sa ilang Facebook post sa Biyernes, Disyembre 27, 2019.

“Merry Christmas and Happy New Year to the workers of Central Visayas,” kini nidugang.

Ubos sa Wage Order No. ROVII-22, mga trabahante sa non-agricultural sector sa Class A cities ug mga lungsod duna nay inadlaw nga P404 nga minimum nga sweldo human madawat ang P18 nga umento.

Mga trabahante sa agriculture sector ning mao nga mga dapit makadawat og umento nga P26. Ang ilang minimum wage mahimo nang P394 gikan sa P368.

Kadtong mga establisemento nga dunay ubos sa 10 ka mga trabahante, makadawat na og minimum nga P394 human sa umentong P18.

Mga Class A nga mga siyudad mao ang Carcar, Cebu, Danao, Lapu-Lapu, Mandaue, Talisay ug Naga. Class A nga mga lungsod mao ang Compostela, Consolacion, Cordova, Liloan, Minglanilla, ug San Fernando.

Sa Class B cities ug mga lungsod, ang mga mingkita og minimum nga suholan sa non-agriculture sector ug mga establisemento nga dunay ubos nga 10 ka mga trabahante makadawat og umento nga P18 ngadto sa P28 samtang mga trabahante sa agriculture sector makadawat og P33 ngadto sa P48 nga umento.

Ang bag-ong minimum nga suholan sa mga trabahante sa non-agriculture sector ning mao nga mga dapit mahimo nang P366 matag adlaw.

Mga trabahante sa agriculture sector ug mga establisemento nga dunay ubos nga 10 ka trabahante swelduhan na og P361 matag adlaw.

Ang Class B cities mao ang Bais, Bayawan, Canlaon, Dumaguete, Guihulngan, ug Tanjay sa lalawigan sa Negros Oriental ingon man Bogo ug Toledo sa lalawigan sa Sugbo ug Tagbilaran sa Bohol.

Sa Class C areas, o kadtong wa maapil sa Class A o B, mga trabahante sa non-agriculture sector makadawat og P8 ngadto sa P33 nga umento kun, P356 matag adlaw.

Ang agricultural workers ug kadtong mga trabahante sa mga establisemento nga dunay ubos lang sa 10 ang nagtrabaho ubos sa Class C swelduhan na og P351 matag adlaw. (HDT, SunStar Philippines)