PHILIPPINE National Police (PNP) dili mohatag sa mga dokumento sa mga kaso sa patay lukop nasud ngadto sa United Nation Human Rights Council (UNHRC) kon wala'y pagtugot ni Presidente Rodrigo Duterte.

Mayorya sa mga nasud nga miyembro sa UNHRC pabor nga ipaubos sa imbestigasyon ang kagamhanan sa Pilipinas nunot sa gidaghanon sa mga nangamatay sa gubat batok sa ilegal nga drugas.

Apan mipagawas na daan og mensahe ang PNP nga dili sila mohatag sa mga dokumento sa imbestigasyon sa tanang kaso sa mga napatay atol sa anti-drug operation sa kapulisan.

Matud ni Police Lieutenant General Archie Francisco Gamboa, deputy PNP chief for operation, usa ka political issue ang hukom sa UNHRC ug angayan nga ang gobyerno sa Pilipinas ang moatubang niini.

Iyang giklaro nga kon ang presidente na ang momando kanila nga ipakita ang dokumento sa resulta sa imbestigasyon, andam nila kining buhaton.

“Kinsa man ang normal nga tawo nga isubo nimo. Di man mi nag-ingon nga dili mi prepared but nganong amo man ihatag sa inyo nga kaya man namo ni resolbahon. Go to our regular court if you want to complain,” matud ni Gamboa.

Gikuwestyon ni Gamboa ang UNHRC nganong mohimo sila og imbestigasyon nga ang gobyerno sa Pilipinas nag-function man.

Iyang gipasabot nga manginlabot lang ang United Nation kon ang usa ka nasud gubot na ug wala mapatuman ang balaod.

Si Police Colonel Gemma Vinluan, ang bag-ong hepe sa Cebu City Police Office, nagkanayon nga usahay dili malikayan nga mapusilan-patay sa pulis ang mga target sa anti-drug operation, ilabi na kon mosukol kini.

Apan wala kini magpasabot nga extrajudicial killings na kini sanglit nagdepensa lang sila sa ilang kaugalingon.

Iyang mando sa mga pulis sa Dakbayan sa Sugbo nga, kon mahimo, respetohon ang tawhanong katungod sa mga suspetsado apan kon mabutang sa peligro ang ilang kinabuhi, diha pa sila modesisyon nga mogamit sila sa ilang mga armas.

Tinguha niya nga ipaubos sa training ang mga pulis unsaon pagdakop ang usa ka drug personality nga dili masamaran kon mabantayan nga mosukol. (Superbalita Cebu)