PATAS-AN ang railings ug butangan og mga net ang duha ka mga kilid sa duha ka mga taytayan sa Mactan.

Mao kini ang buhaton sa Department of Public Works and Highways (DPWH) aron di na himuong hikuganan ang duha ka mga taytayan.

Pinaagi sa pagpataas sa railings, lisod na ang pagkatkat unya sa tawo nga gustong moambak. Kon makahimo man sa pagkatkat ug moambak, dunay makasawo nga mga net.

Apan samtang trabahuon pa kini sa DPWH, ang Mactan-Cebu Bridge Management Board (MCBMB) mopatuman una og pipila ka mga lakang.

Duna na unyay curfew sa mga padestrian nga molabang sa taytayan, labina sa lawom nang kagabhion ngadto sa sayo sa buntag.

Naobserbahan nga sagad sa mga pagsuway og ambak nahitabo sa lawom nang gabii ngadto sa kaadlawon.

Gawas niini, butangan usab og mga police outpost ang masigka tumoy sa duha ka mga taytayan aron dunay mobantay ug makaresponde gilayon.

Laing gisugyot mao ang paggamit og video analytics ug artificial intelligence.

Si Gobernador Gwendolyn Garcia, pangulo sa MCBMB, nikwestyon sa Traffic Situation and Monitoring Team (TSMS), kon nganong di sila makabantay dayon sa mga tawo nga moambak sa mga tulay.

Si TSMS analyst Leo Bacus nipasabot nga bisan kon 24 oras ang pag-monitor sa closed circuit television (CCTV) camera sa duha ka mga tulay, aduna gihapoy mga blind spot hinungdan nga aduna makalusot sa paglayat.

Taliwala sab sa pag-upgrade sa ilang CCTV cameras, ilang giangkon nga maglisod sila sa mano-mano nga pagtan-aw ug pag monitor sa tanang kalihukan sa tulay.

Gawas sa video analytics, si Land Transportation Office (LTO) 7 Regional Director Victor Caindec nisugyot sa paggamit og artificial intelligence arun mas dali na ang pag monitor sanglit aduna nay teknolohiya nga mo-signal dayon kon dunay nabantayan nga lahi nga kalihukan.

Sa report ni Bacus, kasagarang mahitabo ang suicide ug suicide attempts sa kaadlawon ug kasagaran sa mga kaso, magtuo ka nga simple lang nga pedestrian o nagbisekleta ang niagi.

Nunot niini, gimando ni Garcia nga pasirad-an ang usa ka pedestrian lane sa duha ka mga tulay aron mas dali ang pag-monitor.

Sugod sab sa ala 1 sa kaadlawn ngadto sa alas 5 sa buntag, di paagian ang mga tulay sa mga pedestrian. Hingpit sab nga gi-ban ang mga bisekleta sa pag-agi sa tulay. Wa pay petsa kon kanus-a ipatuman.

Uyon si ‘Ahong’

Gihangop ni Lapu-Lapu City Mayor Junard “Ahong” Chan ang planong pagpatuman og curfew sa duha ka mga taytayan.

Gibutyag hinuon sa mayor nga 24/7 na nga gibantayan sa kapulisan sa dakbayan ang unang taytayan sukad sa miaging semana. (GCM, PR)