Usa sa upat ka mga lawas nga naugkat gikan sa bukirang barangay sa lungsod sa Compostela nailhan na human ang usa ka kabanay niini niadto sa punerarya sa Miyerkules sa buntag, Oktubre 7, 2020, diin gihaya ang upat.

Ang biktima giila ni Christy Cañeda Banilad, 34, nga iyang pag-umangkon nga si Elmer Cañeda Enanoria, hingkod, ulitawo, taga Riverside, Barangay Bulacao Pardo, Dakbayan sa Sugbo.

Si Banilad niadto sa Angga Funeral Homes sa Catarman, Liloan mga alas 8:30 sa buntag sa Miyerkules.

Matod sa kapulisan sa lungsod sa Compostela nga si Banilad nisulti nga ang iyang pag-umangkon nga usa ka construction worker nalambigit sa illegal drugs sa Dakbayan sa Sugbo.

Sa pagkakaron, ang Regional Crime Laboratory Office 7 mopahigayon og autopsy, pinaagi kang Dr. Benjamin Lara,medico legal officer, sa upat ka mga lawas aron pagdeterminar unsa ang ilang namatyan. (GPL)