SUBLING nag-rally ang dul-an 100 ka mga vendor sa Plaza Sugbo atubangan sa Cebu City Hall aron hangyuon si Mayor Edgardo Labella nga pabalikon sila sa pagpaninda sa ilang kanhi pwesto.

Duna usay nangayo kanila og ayuda gikan sa Siyudad. Naningil sila sa saad sa mayor nga makabalik sa pagpaninda.

Ang mga vendor pulos nangangkon nga grabe na ang ilang kalisod nga nasinati sanglit sulod na sa tulo ka buwan nga wa silay klarong halin.

Sila kasamtangang gipahiluna sa Tabo Sa Banay ug sa F. Gonzales Street human sila gipapahawa sa dalan Colon ug Osmena boulevard.

Si Raquel Bohol-Arce, pangulo sa Prevention Restoration Order Beautification Enhancement (PROBE), nagkanayon nga di makabalik sa pagtinda ang kanhi mga vendor sa Colon ug Osmena boulevard sanglit ang karsada maoy gipahawanan sa Department of the Interior and Local Government (DILG).

Ang mga vendor gusto mobalik sa kanhi nila gitindahan sanglit ilang sabot gisaaran sila ni Mayor Edgardo Labella nga makabalik dihang niatubang kini kanila sa miaging semana.

“Nakasulti og ingon ato ang mayor kay giunhan nga adunay tawag or order sa office ni Senator Bong Go nga nag-ingon nga walay labot ang Cebu City,“ matod ni Arce. “Akong gi-verify sa DILG, wala silay nadawat nga tawag. Ang akoa lang para dili mapasapasa, mangayo ko og kopya or patagai ko og kopya kay kon tinuod nga gusto niya walay labot ang Cebu City sa memorandum circular, naa tay ebedinsya, “dugang ni Arce.

Sa pagkakaron, padayon pang nangita og alternatibo ang City Government nga mahatagan og alibyo ang problema sa mga vendor nga makatinda ug mokusog ang ilang halin.

Nangayo og ayuda

Si Lawrence Ricana, usa sa mga apektado nga vendor nangaliyupo sa City Government nga samtang wala pa silay klarong kita, tagaan sila og tabang sa City Government. Iyang gihulagway nga bisan tagaan sila og tag 10 ka kilong bugas, sardinas ug uban pa para aduna silay ikapakaon sa ilang mga anak.