PAGDILI sa videoke sa adlawan dii lang ipatuman sa Dakbayan sa Sugbo kay ang Police Regional Office 7 director nimando sa tanang city ug provincial police offices sa Central Visayas nga iimplementar kini sa tanang lugar.

Nakita ni PRO 7 chief Brigadier General Albert Ignatius Ferro nga epektibo ang pagdili sa videoke sa adlawan sa Dakbayan sa Sugbo aron makatarong sa pagtuon sa ilang leksyon ang mga estudyante nga naa sa ilang balay nag online classes o nanubag sa module sa matag subject.

Nipatuman ang Cebu City Police Office sa tanang barangay sa dakbayan tungod kay daghan ang reklamo nga nadawat sa kapulisan bahin sa kasaba sa videoke sa adlawan taliwa sa pagbukas sa klase.

Si Ferro niawhag sa samang higayon sa mga mayor sa pagluwat og executive order aron mabasehan sa pagpatuman sa kapulisan.

“We will follow the directive of our chief PNP. It will be much appreciated if kanang mga local government will have their executive order para kusog ang atong enforcement,” matod ni Ferro.

Si Mayor Edgardo Labella sa dakbayan sa Sugbo nisuporta sa tinguha sa CCPO hinungdan nga niluwat siyag executive order pagdili sa pag-videoke gikan sa alas 7 sa buntag hangtod sa alas 5 sa hapon.

Alang hinuon kang Ferro nga molusad una sila og information drive sa kabarangayan labot sa anti noise ordinance ug mamadlong lang una ang mga pulis sa dili pa sila manakop.

“Siguro we have to inform muna. Information dissemination then we have a moratorium muna like one day information,” matod ni Ferro.

Ipaklaro pa hinuon ni Ferro ngadto sa kampo Crame ang memorandum labot niini.