Kon ang ubang mga probinsya ug lungsod sa nasud nipahigayon na sa pipila ka mga kalihukan sa pista, gipanglantawan nga sa ikaduhang higayon, suspendido gihapon ang Sugat-Kabanhawan sa lungsod sa Minglanilla.

Kini maoy gibutyag ni Minglanilla Mayor Elanito Peña sa interbyu sa mga tigbalita sa Miyerkules, Enero 20, 2020.

Matod ni Peña nga tungod sa padayon nga hulga sa coronavirus disease (Covid-19) mas importante nga unahon ang seguridad ug kaluwasan sa panglawas sa mga konstituente.

“Para nako, kon wala pa na ang vaccine, dili lang usa. Bisan og naa pay vaccine, dili pa sad ta kasiguro ana kay tan-awon pa man gud na ang sitwasyon ana gud,” matod ni Peña.

“Dili man pod advisable nga kon mabakunahan na, mobiya na sad ka sa imong mask. Pag distancing, dili man na ingon ana. At least kon ma vaccine ka, kanunayon na gyud na ang mask ug ang distancing,” dugang ni Peña.

Nipasalig si Peña nga kon mahapsay na ang sitwasyon sa nasud ug tugutan na ang normal nga pagtapok, mahimo na kining magsaulog apan kinahanglan nga mosubay gihapon sa mga lagda sa kaulohan.

“Akong mensahe lang sad sa mga taga Minglanilla nga sa pagkakaron, dili pa gyud ta makapahigayon sa Sugat tungod kay wala pa sad tay vaccine, pero puhon next year mag-Sugat ta.”

Tungod sa kasayo magsugod sa Kwaresma sa Pebrero 17, 2021, ang Kabanhawan ipahigayon unta sa Abril 3, 2021, nga mao ang adlaw sa Pasko sa Pagkabanhaw.

Sa uwahing datos sa lungsod, nakatala kini og 26 ka mga aktibong kaso sa Covid.

Tungod niini, niabot na sa 679 ang kompirmadong mga kaso sa lugar sugod sa pagsulbong sa sakit. Sa maong datos, 621 na ang nangaayo, apan 32 na ang nangamatay.

Gikanselar ang Sugat-Kabanhawan sa 2020 tungod sa hulga sa Covid-19.

Nalakip ang lungsod sa mga lugar nga kapila nibalik sa hugot nga community quarantine tungod sa taas nga mga infection.

Ang lungsod sa Minglanilla maoy ikaduhang lungsod nga nahimutang sa habagatan ug ilado isip Sugat Capital sa Sugbo.

Ang pista subay sa pagsaulog sa Pasko sa Pagkabanhaw nga dagsaon sa mga deboto ug mga bisita matag tuig. (ANV)