Wala mailhi nga lalaki nga gituohang gi-salvage napalgan mga alas 8:00 sa buntag sa Sabado, Abril 9, 2022 sa Purok Sambag I, Brgy. Ilaya, lungsod sa San Fernando, habagatang Sugbo.

Ang kapulisan nihulagway sa biktima nga nagsul-ob sa white t-shirt nga dunay blue ug naka-white checkered shorts.

Ang biktima dunay daghang mga samad pinusilan sa ulo.

Si Police Staff Sergeant Paul Baclay sa San Fernando Police Station nga nahinabi sa Superbalita Cebu nagkanayon nga ang biktima nakit-an nga nagbuy-od sa kanal daplin sa karsada.

Walay nakakita kon kinsay nagbilin niini sanglit nagtuo sila nga gabii o kaadlawon gilabay.

Ang duha ka mga kamot sa biktima gibinaklid sa paggapos samtang baba giputos sa masking tape samtang ang nawong giputos sa panapton.

Gipasul-ob kini sa tube mask samtang naghayang ang biktima sa kanal.

“Salvage gyud ni siya, diri lang ni gilabay sa mga suspek kay mingaw ning dapita,” dugang ni Baclay.

Sa pagkakaron nagpadayon pa sa pag-imbestigar ilang intelligence operatives. Sa pagsuwat ning taho, wala pay ni-claim sa lawas sa biktima.