GIINGONG napakgang ang date sa usa ka lalake nga nakigtagbo sa iyang hinigugma sa plaza sa lungsod sa Dumanjug human siya nakit-an sa usa ka pulis sa lungsod kay wanted sa kasong murder.

Giingong nakabantay si Domingo Torres Dalucanog, alyas Jay, 21, hinungdan nga nahitabo ang gukdanay tali kaniya ug sa pulis hangtod na nga nadakpan.

Si Police Major Ardioleto Cabagnot, hepe sa Dumanjug Police Station, niingon nga si Dalucanog, taga Barangay Bitoon, nasikop Miyerkules sa kaadlawon, Disyembre 4.

Si Dalucanog dunay warrant of arrest sa kasong murder human nalutsan og warrant of arrest nga pinirmahan ni Judge Bernarditto M. Malabago, assisting judge sa 7th Judicial Region sa Regional Trial Court Branch 60.

Way girekomendar nga piyansa sa kaso batok kang Dalucanog.

Si Dalucanog maoy suspek sa pagpusil sa duha ka mga tawo niadtong Mayo 27, 2019 sa Barangay Bulak sa maong lungsod.

Nangaangol mao sila si Isidro Arnaiz ug Herion Fabe, apan wa mopakitag interest ang mga biktima sa pagpasaka og kaso.

“Wala gyud mahimo ang pulis ana kon dili sila mo file og kaso,” matod ni Cabagnot.

Dugang ni Cabagnot nga si Dalucanog usab ang suspek sa pagpusil patay kanila ni Leo Angana ug Arnel Bayabian niadtong Mayo 29, 2019 kun duha ka adlaw human siya mamusil sa laing duha ka mga tawo.

Tungod niini, gipasakaan siya og kasong murder. (BBT)