KAPISTAHAN sa Dakbayan sa Naga magmingaw.

Bisan kon gipaubos na sa modified general community quarantine (MGCQ) ang dakbayan, nadesisyonan ni Mayor Kristine Vanessa Chiong nga wa unyay ipahigayon nga kalihokan pagsaulog sa kapistahan ni Senor San Francisco sa Assisi sa siyudad ning tuiga.

Kini subay sa pag-extend ni Presidente Rodrigo Duterte nga ipaubos gihapon sa state of calamity ang nasud.

Ang siyudad mosaulog unta sa ika-191 nga tuig sa kapistahan ni Senyor San Francisco sa Assisi sa Oktubre 10.

Apan subay sa impormasyon nga giluwatan sa Siyudad, higpit nga gidili ang pagpahigayon og kalingawan o bisan unsa nga kalihukan aron malikayan ang pagkatap sa kagaw sa coronavirus disease (Covid-19).

Gipasidaan niini nga gidili ang kalingawan o ba kaha ang pagbaligya sa plaza, boardwalk, baywalk bisan pa sa atubangan sa simbahan atol sa naghinangat nga adlaw sa pista.

Tungod kay walay kasaulogan, may ipahigayon hinuon nga misa novena sa Oktubre 1 ngadto na sa Oktubre 10.

Giawhag sa Siyudad ang mga konstituente sa pagsubay gihapon sa mga lagda kalabot sa health ug safety protocol sama sa pag sul-ob og face mask, face shield, ug pagpahigayon og physical distancing aron malikayan nga madugangan ang positibong mga kaso sa syudad.

Gipasalig sa mayor nga sa sunod tuig magsaulog kini sa kapistahan nga makadapit og mga bisita, sadya ug luwas sa sakit. Subay sa datos sa rural health unit sa syudad sa Septiyembre 24, niabot na sa 222 ang kompirmadong mga kaso sa Covid-19, 21 ang aktibong kaso, 172 na ang naka-recover samtang 29 ang namatay. (ANV)