Namatay ang usa ka asawa samtang nakalingkawas ang iyang bana dihang nahugno og kalit ang yuta nga ilang gibarugan niadtong Biyernes sa alas 4 pasado sa hapon, Pebrero 3, 2023 sa Brgy. Sabang, dakbayan sa Danao.

Matud sa Public Information Office (PIO) sa Dakbayan sa Danao, ang dapit usa ka kanhi mining pit nga nahimutang sa likod sa Sabang Elementary School.

Sila si Mejame Papaya, 46, minyo, trabahante sa Mitsumi sa dakbayan sa Danao ug ang iyang bana nga si Edgar naglawog sa baboy dihang nikurog ang yuta dayon nahugno.

Si Staff Sgt. Allan Vertucio, imbestigador sa Danao City Police Station nga nahinabi sa Superbalita Cebu, nagkanayon nga ang biktima ug iyang bana diha sa alad sa binuhing baboy.

Sila nakabantay sa pagkurog sa yuta busa nagdali sila sa paglingkawas sa dapit, apan kalit nga nahunlak ang yuta.

Si Mejame nahabilin kay naabtan sa paghunlak.

Si Edgar nakaabot sa pagdagan padulong sa ibabaw hinungdan nga naluwas.

Ang biktima alas 9:50 na sa gabii sa Biyernes naugkat sa mga sakop sa search and rescue sa kapulisan, Bureau of Fire Protection (BFP), Danao City Disaster Risk Reduction and Management Office (DCDRRMO), Special Assistance on Fire and Rescue Inc. (Safari) ug Brgy. Sabang rescue personnel.

Ang mga sakop sa rescue team ninggamit sa backhoe sa City Engineer’s Office sa ilang pagkuykoy sa yuta sa pagpangita sa biktima.

Sumala ni Vertucio nga ang lungag nga nahulpa dunay gilawmon nga 8 metros ug gidak-on nga 200 sq. m.

Gibutyag ni Vertucio nga ang lugar kaniadto kanhi gi-quarry hinungdan nga dako ang posibilidad nga nahumukan ang yuta ug nahugno tungod sa pagsige og uwan.

Dugang ni Vertucio nga nadugay ang gipahigayon nilang rescue sa biktima tungod kay hinayhinay nga gipanguha ang mga debris sa panimalay ingon man bato ug yuta.

Daling gidala si Mejame sa tambalanan apan patay nang niabot.

Sa pagkakaron ang kapulisan nagpaabot sa lakang nga pagahimuon sa Siyudad.

Andam ang kapulisan pag-abag sa DCDRRMO kon dunay ipahikling nga mga lumolupyo.

Gihulagway niya nga dilikado gyud kaayo ang maong dapit. Gisusi na sa Siyudad ang palibot sa dapit kon di ba kuyaw sa laing paghugno.

Ilang gibantayan ang dapit samtang kini gihawanan.