ORMOC CITY, Leyte- Balik na sab sa zero case sa coronavirus disease (Covid19) ang Ormoc City sa Oktubr 20, 2020.

Nakarekober ug gigiwas na pagkahapon niadtong Martes ang katapusangg active case gikan sa NHA Isolation Facility sa Barangay Dolores.

Ang katapusang active case mao ang usa ka senior citizen nga locally stranded individual (SLI).

Bisan og naka-recover na, pero kinahanglan gihapon niya mag home isolation og pito ka mga adlaw.

Sa paghimo ning balita, gisugilon ni City Health Officer, Dr. Edmund Kierulf, nga naay 30 kapin ka pending swab samples ang Ormoc nga gipaabot ang resulta.

Ang Ormoc City naay 131 ka positibong kaso sa Covid-19 gikan pa niadtong Mayo, usa niini ang nakalas, apan ang 130 hingpit na nga nakarekober.

Naa usab sa 589 ka mga taqo ang naa sa nagkadaiyang isolation facilities sa syudad.

Nag-abiso ang mga doktor ug ang LGU-Ormoc ngadto sa publiko nga di mag-relax ug dapat motuman gihapon sa mga health protocol sama sa social distancing, pagsul-ob og face mask, paghugas sa kamot ug stay-at -home kon way importante nga lakaw.

Sa ubang mga dapit sa Kabisay-an nagkaminos ang mga kaso sa Covid-19.

Apan matod sa Department of Health (DOH) nga di gihapon angay mokompyansa kay naa gihapon ang hulga sa Covid-19.

Ang Ormoc City usa sa mga dapit sa nasod nga ubos sa modified general community quarantine (MGCQ).

Dunay rekomendasyon sa pagpailawom sa halos tanang mga dapit sa nasod nga ipaubos sa MGCQ hangtod sa Disyembre 15, 2020.

Ang MGCQ mao ang labing ubos sa tanang quarantine level. Taas kini sa "new normal". (JKDP)