IPAHIGAYON karong Hulyo 15-21, 2021 ang 1st Law and Justice Run, usa ka virtual running event nga gipasiugdahan sa Integrated Bar of the Philippines (IBP) Cebu Chapter.

Sa usa ka virtual press conference kagahapon, Hunyo 3, 2021, nagkanayon si IBP Cebu chapter official Michelle Mendez Palmares nga nadasig sila sa pagpahigayon ning maong lumba tungod sa Cebu Marathon, nga nagpasiugda sab og virtual run ning tuiga isip paghinumdom sa ika-500 ka mga tuig nga kasaulogan sa paghangop sa nasod sa Kristiyanismo.

Gipasabot ni Mendez nga wala’y ganting salapi nga ipanghatag sa lumba ug garbo sa kaugalingon lang ang maangkon sa mga mananaog. Hinuon adunay ipanghatag nga mga medalya ug certificates.

Gitataw ni Mendez nga abli ang lumba alang sa tanang mga interesado sa tibuok kalibutan.

Ang 1st Law and Justice Run gilangkuban og lima ka mga kategoriya. Kini mao ang 3K Fun Run, 5K, 10K, 15K ug 21K.

Ang rehistrasyon sa 3K nagbalor og P280, nakantidad og P520 sa 5K ug 10K samtang P780 sa 15K ug 21K.

Aron makaparehistro, mahimong mo-log-in sa ibprun2021.myruntime.com.

Ang mga partisipante kinahanglang mogamit og mga ekipo sa pagdagan aron ma-rekord ang ilang oras. (ESL)