MAKIGHUGPONG ang International Olympic Committee (IOC) sa mga kadagkuan sa international sports organisations karong adlawa aron tukion sa angayang nilang pagabuhaton ning pagkuyanap sa coronavirus outbreak (Covid-19).

Sa grabeng hulga nga hatod sa Covid-19, aduna’y mga pangutana nga ningtumaw kon madayon ba o dili ang 2020 Tokyo Olympics, nga nakatakdang sugdan karong Hulyo 24.

Ang Covid-19, nga nagagikan sa Wuhan, China, ningtakod na sa 160,000 ka mga tawo ug nakakalas na’g 60,000 ka mga kinabuhi.

Ubay-ubay na sab nga Olympic qualifying events ang nakanselar gumikan sa Covid-19.

Hinuon, si Japanese Prime Minister Shinzo Abe ug ang Tokyo 2020 organizers miklaro nga dili mausab ang plano ug mapahigayon ang matag upat ka mga tuig nga kompetisyon sa mismong gikatakda nga petsa niini.

Ang IOC padayon nga nagsusi sa sitwasyon ug nakigsabot sa Japanese organizers.

“Since this situation started to develop some weeks ago, the IOC is constantly updating its stakeholders on the latest developments,” opisyal nga pamahayag sa IOC.

“The calls are part of this regular information sharing process.”

Gilauman nga human sa panaghugpong karong adlawa, adunay dakong ianunsyo ang IOC. (ESL)