NAGHINAMHINAM na ang mga magduduwa sa Philippine Basketball Association (PBA) nga makabalik og duwa apan wala na seguro’y makatupong sa kahinam nga gibati ni Calvin Abueva.

Niadtong Septiyembre 17, 2020, gianunsyo sa PBA nga mobalik na ang aksyon sa liga karong Oktubre 9, 2020 sa Clark City sa Angeles, Pampanga pinasubay sa “bubble concept.”

Kapin na sab sa usa ka tuig nga wala nakaduwa si Abueva gumikan sa indefinite suspension nga gipahamtang sa PBA ngadto kaniya tungod sa mga salaod nga iyang nahimo kaniadto.

Atol sa pag-anunsyo sa pagbalik sa liga, nahisgutan ni Commissioner Willie Marcial nga posibleng ilakip na si Abueva sa line-up sa Phoenix Fuel Masters.

Sa iyang kahinam, nag-post og throwback picture si Abueva sa social media nga adunay caption nga “Come back is real.” (ESL)