Human sa malampuson nga pag-host sa VisMin Super Cup Visayas leg, andam ang lungsod sa Alcantara nga mohangop sa ubang sporting events nga ipahigayon sa bag-ong gi-renovate nga Alcantara Civic Center.

Kini maoy gibutyag ni Alcantara Mayor Fritz Lastimoso sa Superbalita Cebu pipila ka mga adlaw human sa usa ka buwan kapin nga VisMin Super Cup, ang bag-ong professional basketball league sa nasod.

Gibutyag sa batan-ong mayor nga nakadawat siya og maayong feedback sa pag-host nila sa maong kompetisyon nga gipaubos sa bubble-type tournament.

“Well, nindot man ang feedback. Daghan man ang nanawag nato ug positive man ang ilang comments,” matod sa mayor.

“Based sa atong experience, sa gihapon andam ta nga mo-host og dagkong events basta tan-aw nato makaya ra.”

Ang mga duwa, gipasalida sa Solar TV, Youtube ug ingon man, aduna sab kini live streaming sa social media.

Niini, nahatagan og igong national ug international exposures ang Alcantara, usa ka gamayng lungsod nga nahimutang sa habagatang bahin sa Sugbo nga gilangkuban lang og siyam ka mga barangay.

Sa sayo pa, ang mayor nanglantaw nga ang sports tourism maoy usa sa iyang tutokan aron sa pagpalambo sa iyang lungsod. Kabahin niini mao ang pag host ug national o international sporting events.

Si Rey Canoy, ang sports commissioner sa maong lungsod, mibutyag nga nakadawat usab siya og mga tawag gikan sa sports organizers nga nagpakisusi kalabot sa pagpahigayon og events sa ilang dapit. / JBM