USA si Cebuano darter Ramon Alcoseba sa mga kampiyon sa Classified Draw Triples category sa Philippine Open Tacloban US$100,000 International Dart Tournament nga nahuman sa miaging adlaw sa Leyte Academic Center sa Palo, Leyte.

Si Alcoseba, founder ug team captain sa Cebu Darters United (CDU), nakigbahin sa titulo nila ni Patrick Jugo sa Tropang Amber ug Alvin Maguate sa Team Pacman.

Nakabulsa si Alcoseba og US$1,000 sa iyang kalampusan sa torneyo, nga gisalmutan og 468 ka darters gikan sa 156 teams.

Ang laing mga sakop sa CDU nga sila si Dominic Soquiño, Randy Ricamura ug Reyden Colina nahiluna gikan sa ika-17 ngadto sa ika-19.

Ang Sugbuanong darters nag-training sulod sa dul-an sa upat ka mga buwan alang ning maong lima ka mga adlaw nga kompetisyon.

Sa Four-Man category, ang Sugbuanong darters nga sila si William Ugang Jr., Dino Bacayo, Rodrigo Pamatian ug Reyden Colina nahimutang sa ika-16 nga puwesto.

Samtang sa Seniors’ singles, ang laing darter sa Sugbo nga si Bethoven Campugan nahiluna sa ikawalo.

Mokabat ngadto sa US$1,540 ang tanang nahipos nga ganti sa mga taga Sugbo. (RSC, ESL)