BIYA man tuod kaayo sa tapad, apan usa ka dakong hagit alang ni Rocky Fielding ang iyang pagpakigsangka karong adlawa batok sa banggiitan ug inilang boksidor sa tibuok kalibutan nga si Canelo Alvarez.

Ang away nga usa ka World Boxing Association (WBA) Super Middleweight world title fight ipahigayon sa Madison Square Garden sa New York City diin si Alvarez inilog sa pustaanay 1-por-16.

Ang record maoy igong makahatag og katin-awan kon nganong dako kaayo og gintang ang logro sa pustada.

Si Alvarez kinsa nakaaway na og mga dekalidad na usab nga mga kontra sama nila ni Gennady Golovkin, Julio Cesar Chavez ug uban pa, adunay 50-1-2 nga baraha nga may 34 ka knockouts samtang si Fielding sa United Kingdom mosaka sa ring karong buntag nga may 27-1 nga record ug 15 ka knockouts.

“I’m fighting the biggest star in boxing and headlining at Madison Square Garden. Anyone would be stupid to say, ‘no, I’ll leave that and go and fight on the undercards at the O2 [Arena] or the Echo Arena,” matod ni Fielding sa usa ka interview. JBM