NAGPLANO ang Pinoy nga boxing world champion nga si Jerwin Ancajas nga mosaka og timbang human sa mga katuigan nga naghari siya sa International Boxing Federation (IBF) junior bantamweight division.

Sa interbyu ni Australian promoter Peter Maniatis, nagkanayon si Ancajas nga plano niyang mosaka sa bantamweight division aron mangita og mas dagkong mga away.

Sa dili pa siya mosaka, gusto una ni Ancajas nga makaaway og unification bout sa kasamtangan niyang timbang.

Si Ancajas gilaumang makabalik og away karong Septiyembre 2020 sa Amerika ug nanghinaot siya nga mahatagan na siya’g oportunidad alang sa usa ka unification bout ning higayuna.

Nagkampanya si Ancajas sa junior bantamweight gikan pa niadtong 2009.

Gipasabot sa manager ni Ancajas nga si Joven Jimenez nga kaya pa unta sa iyang batos nga moaway sa junior bantamweight apan sa ilang tan-aw, mas dagkong oportunidad ang naa sa bantamweight.

Nagtapok sa bantamweight ang world champions ug kanhi world champions nga sila si Japanese “Monster” Naoya Inoue, Nordine Oubaali, Emmanuel Rodriguez ug ang mga kababayan nga sila si John Riel Casimero ug Nonito Donaire Jr. / ESL