Nangandam na si kanhi International Boxing Federation (IBF) super flyweight champion Jerwin “Pretty Boy” Ancajas sa Panabo City alang sa iyang rematch batok kang Fernando “Pumita” Martinez sa Argentina.

Ang rematch posibling ipahigayon karong Hulyo o Agusto, 2022 sa US.

Gibutyag ni Ancajas nga kuwang siya sa preparasyon sa premirong away nila ni Martinez niadtong Pebrero 26, 2022 hinungdan nga napilde siya pinaagi sa unanimous decision.

Gipasabot niya nga niadtong higayuna, nagproblema siya sa timbang gumikan kay dili niya mabuhat ang angay unta niyang buhaton tungod kay daghan siyang kadungan nga nag-training sa usa ka gym sa US.

Sa pagkakaron, hinayhinay nang nagsugod sa pagpangandam si Ancajas sa ilang rematch ni Martinez.