Gipabuhagay sa dugay na’ng trainer ug manager ni ex-world champion Jerwin Ancajas nga si Joven Jimenez nga mobiya siya sa kiliran sa gitawag og Pretty Boy kon magpabilin kining moaway sa super flyweight (115 lbs) division.

Dili pa lang dugay, nabuhian ni Ancajas ang iyang International Boxing Federation (IBF) super flyweight title human siya gilupig ni Argentine Fernando Martinez pinaagi sa unanimous decision.

Adunay rematch clause si Ancajas ning maong away apan alang kang Jimenez, mas maayong mosaka na lang ang iyang batos sa bantamweight (118) gumikan kay maglisod na kini pagkuha sa 115 lbs. weight limit.

Sa interbyu sa GMA News, gibutyag ni Jimenez nga taodtaod na siyang gusto nga mosaka og timbang si Ancajas.