LAING tulo ka player sa Philippine Basketball Association (PBA) ang nipadayag sa ilang kaandam pagserbisyo sa Gillas Pilipinas sa oras nga sila kinahanglanon.

Si Alaska forward Vic Manuel miangkon nga usa sa iyang pangandoy isip basketbolero ang pagrepresentar sa Pilipinas ngadto sa mga international nga kompetisyon.

“Siyempre kon mabibigyan ng chance, malaking tulong yun,” matod ni Manuel, kinsa mihimo og 24 points para sa kadaogan sa Alaska ngadto sa San Miguel.

“Gusto ko rin namang makatulong sa kanila (Gilas).” dugang pa niya.

Si Manuel, Christian Standhardinger ug Arwind Santos ang mga player nga posible nga mohulip sa tulo sa napulo ka players nga na-suspenso human sa nahitabong away atol sa duwa sa Pilipinas ug Australia sa FIBA World Cup qualifier, tulo ka semana ang milabay.

Matod ni PBA Commissioner Willie Marcial nga human gi-anunsyo sa FIBA ang mga suspension niadtong Huwebes, ang PBA Board nihatag na sa go-signal sa Gilas nga mangita og ikahulip sa mga na-suspenso nga national team members.

Sa tulo, ang serbisyo ni Standhardinger ang pinaka-importante para sa Gillas kay mao kini ang mohulip kang Andray Blatche, kinsa napahamtangan og three-game suspension ug di makaduwa hangtod sa tunga-tunga sa second round sa qualifier.

“Everybody knows I’m always open to it and I always want to,” ni Standhardinger pa.

Samtang ang 36-anyos nga Santos, kinsa usa kaniadto sa Powerade-Philippine team ni coach Yeng Guiao sa 2009 Fiba Asia Championship sa Tianjin, China niingon nga andam usab siya nga mo hatag sa iyang serbisyo sa oras nga siya tawagon. (Jude Suhot)