TAGSATAGSANG gipangrehistro sa Kiboy's Computer Solution ug ARQ-Builders/KSB Glass ang ilang ikatulong sunod-sunod nga kadaugan sa nagpadayon nga Cebu City Mayor Edgar Labella Charter Cup nga gipahigayon Huwebes, Pebrero 20, 2020, sa Sports Institute gym sa Sawang Calero, Dakbayan sa Sugbo.

Pinangulohan ni Melvin Butohan, kinsa mihagdaw og 15 puntos, ang Kiboy's Computer Solution yanong midabo-dabo sa wa pay daog nga LM Paragsa, 98-79.

Gikan sa sinugdan hangtod sa katapusang yugto sa panag-engkuwentro, gikontrolar sa Kiboy's ang tanang departamento ug wa gyud mohatag og lugak aron masiguro ang kadaugan.

Si Ted Saga midugang og 13 puntos samtang 11 usab ang natampo ni Harold Cincoflores kinsa mipakatap og unom ka assists.

Midugang og nuebe puntos si Joshua dela Cerna, otso puntos gikan ni Adrian Lao ug siete puntos usab ang natigom ni Rino Berami, gawas sa iyang siyam ka rebounds.

Sila si J. Diamante ug J. Sable nangulo sa LM Paragsa nga may tag 14 puntos.

Ang ARQ Builders, sa ilang bahin, miagi una og hugot nga kombati sa first half una pa makulit ang 92-80 nga kadaugan batok sa Aspa Formworks.

Nagginabsanay ang duha ka koponan sa sayong bahin nga nagpulipuli og sakmit sa labaw.

Apan misugod pag-arangkada ang Builders sa dihang mipahagsa kini og 16-6 nga rally, kortesiya nila ni Ferdinand Lusdoc, Lyndon Gudez, Russel Moneva, Jojo Tangkay ug Shaquille Imperial, nga maoy misira sa third quarter, 69-57.

Gikan niini, ang Aspa, nga mipakaging sa inilog nga Athalia 1-on-1 sa niadtong Miyerkules, wala na makagukod pa, ug nahagsa sa ilang ikaduhang kapildihan sa tulo ka duwa.

Upat ka mga Builders, pinangulohan ni Lusdoc nga may 21 puntos, ang nakapugnit og double-figure sa scoring.

Si Tangkay may 16 puntos, ug 12 puntos usab matag usa ang natampo nila ni Imperial ug Gudez.

Si Alfred Codilla, Frangile Omolon ug Jessie Baclaan nagkumboya og 61 puntos sa kapildihan sa Aspa.

Sa laing duwa, ang Fighter 50 misandig sa ilang mga beterano aron iduot ngadto sa peligrusong dapit ang Athalia, 94-82.

Ang kanhi PBA player nga si Danny Aying maoy nangulo sa Fighter 50 nga may 19 puntos.

Midugang usab og 18 ang batan-ong si Dyll Roncal, 17 gikan ni Jayvee Mantilla ug 16 usab ang natampo ni Dondon Hontiveros.

Ang Athalia nga nahagsa sa 0-3 nga baraha nakakuha og 26 puntos gikan ni John Reel Saycon.

Aron makakuha og luna sa crossover semifinals round, kinahanglan dag-on sa Athalia ang ilang nahabiling duha ka duwa sugod karong gabii ug manghinaot nga mapildi ang Aspa batok sa Fighter 50 ug sa LM Paragsa.

Dili usab halayo ang posibilidad nga adunay mahitabong triple-tie tali sa Aspa, Athalia ug LM Paragsa alang sa ikaupat nga lingkuranan sa semis.

Samtang buk-on sa ARQ Builders/KSB Glass ug Kiboy's Computer Solution ang panagsawo sa liderato sa ilang panagtigi sa main game sa triple-header karong gabii.

Ang duha pulos wala pay pildi sa tulo ka mga duwa, 3-0.

Ikasakbang usab sa Fighter 50 ang Aspa sa second game samtang magtakos ang Athalia ug ang LM Paragsa sa opening match.

Mga duwa karong Biyernes, Pebrero 21:

5:30 p.m. Athalia 1on1 vs LM Paragsa

7:00 p.m. Fighter 50 vs ASPA

8:30 p.m. ARQ Builders/KSB Glass vs Kiboy's Computer Solutions

(JBM)