Mga duwa karon

3:00 pm - Terrafirma batok Phoenix

Rain or Shine batok Blackwater

Nabunyagan og kapildihan si Arwind Santos isip usa ka Batang Pier.

Naningkamot og maayo si Santos apan nausik ang tanan dihang gipatapsingan sa Alaska Aces ang NorthPort Batang Pier, 87-85, kagahapon, Disyembre 8, 2021 sa pagsugod sa 2021 Philippine Basketball Association (PBA) Governor’s Cup sa Ynares Sports Arena sa Pasig City.

Si Santos, kinsa kanhi sakop sa gikahadlukang Death Five sa San Miguel Beermen apan nabalhin sa NorthPort dili pa lang dugay, nipagawas sa tanan niyang makaya aron agakon ang bag-o niyang puwersa apan wala motugot ang Aces niini.

Gipangulohan ni Santos ang Batang Pier pinaagi sa pagrehistro og 23 puntos samtang ang ilang import nga si Cameron Forte nitunol og double-double nga 18 puntos ug 15 rebounds.

Ang Aces gipangulohan sa ilang balik-import nga si Olu Ashaolu pinaagi sa iyang 20 puntos ug 14 rebounds samtang niamot og 19 puntos si Jeron Teng.