GIPADAYAG sa asawa ni Calvin Abueva nga si Sam ang iyang kasagmuyo kon nganong hangtod karon, wala gihapon gilibkas sa Philippine Basketball Association (PBA) ang suspensyon nga gipahamtang niini ngadto sa iyang bana.

Sa taas niyang mensahe sa iyang post sa Instagram, gikuwestiyon ni Sam kon nganong wala gihapon gilibkas ang suspensyon sa iyang sa bana nga unta nilanat na man kini og siyam ka mga buwan.

“Gusto ko lang malaman kung ano pa ba ang basehan kung bakit hanggang ngayon, hindi pa rin nakakalaro ang asawa ko. Hindi pa ba sapat ang siyam na buwan para sa parusa na binigay niyo?” tipik sa post ni Sam, nga gilakipan og hulagway sa ilang pamilya.

Ang post ni Sam miabot usa ka adlaw human gibutyag ni PBA commissioner Willie Marcial nga nagpabiling suspendido si Abueva hangtod ning puntoha. Gipasabot ni Marcial nga wala pa makompleto ni Abueva ang tanang kinahanglanon aron malibkas ang iyang suspensyon.

Si Abueva napahamtangan og suspensyon human kini nahilambigit sa sunodsunod nga kasamok kaniadto diin lakip na niini ang iyang pagdapat sa import sa TNT KaTropa nga si Terrence Jones. (ESL)