USA ka Olympic Council of Asia official ang misugyot sa Pilipinas nga mo-bid aron mahimong host sa 2030 Asian Games.

Mao kini ang gibutyag ni Ramon Suzara, chief operating officer sa Philippine Southeast Asian Games Organizing Committee (PHISGOC).

Matod ni Suzara nga nakadayeg si OCA vice president sa New Clark City athletics and aquatics facilities sa Capas town, Tarlac nga nahilakip sa venues sa kasamtangang nagpadayon nga 2019 Seag.

“Noong nakita niya ’yung Clark, sabi niya ang ibang bansa walang ganu’n. Sinabihan kami na, ‘Why not bid for 2030 for that kind of facility?’” matod ni Suzara nga napatik sa www.abs-cbnnews.com.

“Walang masama sumubok 10 years from now.”

Ang magsunod nga duha ka Asian Games ipahigayon sa Hangzhou, China karong 2022 ug Nagoya, Japan karong 2026.

Ang Pilipinas mao ang host sa ikaduha pa lang nga edisyon sa Asian Games niadtong 1954 apan wala na kini masundi hangtod karon.

Gawas sa Pilipinas, ang ubang mga nasod sa Southeast Asia nga naka-host na sa Asian Games mao pa lang ang Indonesia (1962 ug 2018) ug Thailand (1966, 1970, 1978 ug 1998). (ESL)