Natuman ang gisaad ni Filipino bantamweight Vincent ‘Asero’ Astrolabio nga hatagan og knockout win ang iyang promoter nga si Manny Pacquiao alang sa ika-44 nga birthday niini.

Gipakatulog ni Astrolabio ang Russian nga si Nikolai Potapov sulod lamang sa unom ka rounds sa Showtime Championship Boxing kagahapon sa The Cosmopolitan Hotel sa Las Vegas, Nevada.

Ang kanhi eight-division world champion nga si Pacquiao nagsaulog sa iyang adlawng natawhan niadtong Sabado.

Dako ang kompiyansa ni Astrolabio sa maong away tungod kay gikan siya sa impresibong daog batok kang Cuban superstar Guillermo Ringodeaux sayong bahin karong tuiga.

Gipakita gyud dayon ni Astrolabio ang iyang abilidad ug kusog pinaagi sa pagtumba sa iyang kontra di lang makausa, kundi sa makatulo ka higayon, sa wala pa mahunong ang away sa 1:26 mark sa ikaunom nga round.

Miyaka si Potapov sa first round tungod sa makabungog nga left hook. Gisundan og lain nga tumba sa fifth round human kini nausban og left hook.

Sa ikatulong tumba ni Potapov wa na gyud kini mobarog sa ihap ni referee Robert Hoyle.

Tungod kay usa ka IBF bantamweight eliminator ang maong away, ang 25-anyos nga si Astrolabio (18-3, 13 KO) malinya na alang sa usa ka title match.

Posible nga mabakante ang IBF nga titulo tungod kay nagplano nga mosaka sa timbang ang undisputed bantamweight champ Naoya Inoue.

Si Astrolabio mikulit sa iyang ika-unom nga sunodsunod nga daog, lima niini knockout. Si Potapov nahagsa ang rekord ngadto sa 23-3-1, 11KOs.