MASALIGON ug determinado ang Australia Boomers nga mabuntog nila ang powerhouse USA Men's basketball team karong adlawa Huwebes, Agusto 5, 2021, sa semifinals round sa nagpadayon nga 2020 Tokyo Olympics.

Ang Australia, ang maoy ikatulong team sa rankings sa world basketball, ang wa na makapatong og balik sa Olympic podium sukad sa Melbourne Games niadtong 1956.

Kaupat ka higayon nga nakaduwa sila alang unta sa bronze medal apan kaupat usab sila mapakyas bisan pa man sa ilang pagsigi og palig-on sa lineup.

Apan alang kang Patty Mills, ang pointguard sa San Antonio Spurs, nga mao na kini ang higayon nga makakuha sila og medalya bisan pa man og mahulagway nga dako nilang babag ang three-time defending champion nga gipanguloha ni Kevin Durant.

“We’ve been to this stage many a time and haven’t crossed the line. But we’ve bottled those experiences up, and I think we’re well prepared for this moment and for this stage to make the next step," matod ni Mills.

Usa sa rason kon nganong masaligon si Mills batok sa USA mao ang mga sinyales nga nagpakita sa weakness niini human sa duha ka sunodsunod nga kapildihan sa exhibition games isip preparasyon sa Olympics.

Lakip na niini ang pagkapukan sa Team USA ngadto mismo sa Boomers.

Napildi usab ang US sa opening match sa France nga maoy ilang unang kapildihan sa Olympics sukad sa 2004.

Hinuon, hinayhinay nga nakabawi ang US ug ang ilang kadaugan batok sa Spain, 95-83, maoy naghatag og agianan alang sa semifinals match batok sa Australia.

Sa ilang bahin, ang Australia yanong midabo-dabo sa Argentina, 97-59, aron usab paghulbot og luna sa semis.

Gisaw-an usab ni Joe Ingles, laing beterano sa team ang pangagpas ni Mills.

“We’ve had one goal in mind, to win a gold medal and leave here with that, and this is a little bit of a stepping stone to what we want to achieve,” ni Englis, ang shooting star sa Utah Jazz.

Ang US Men's basketball team gidumala ni San Antonio Spurs coach Gregg Popovich, ang team nga giduwaan ni Mills sa NBA. (JBM)