TAGSATAGSANG gipangpukan sa Balamban ug Tuburan ang ilang mga kaatbang sa semifinals round sa basketball ug volleyball events aron labnuton ang lingkuranan sa finals sa naghinapos nga Congressman PJ Cup nga gipahigayon niadtong Sabado sa Tuburan Sports Complex.

Sa basketball, ang Balamban ubos sa pagpangulon ni Biasong barangay kagawad Luceno Senarlo, mipatapsing sa Barili, 87-91, samtang ang Tuburan yano ra usab nga mikuniskunis sa Toledo City, 94-64.

Si Bonifacio Branzuela, kapitan sa barangay San Juan mipabaha og 24 puntos aron pangulohan ang kadaugan.

Sa volleyball, gipangsiruhan usab sa Balamban ug Tuburan ang ilang mga kontra aron usab paglabni og tagsatagsa ka luna sa finals.

Ang undefeated Balamban Spikers pabiling limpyo ang ilang baraha human sa ilang 2-0 nga kadaugan batok sa Pinamungajan samtang mao usab kini ang gihimo sa Tuburan batok sa Toledo City, 2-0.

Ang championship game sa duha ka events ipahigayon karong Sabado, Nobiyembre 30 sa wala pa matino nga dapit.

Si Alvin Canada, ang events organizer, mopahibawo lang unya kon asa ang championship games. (JBM)