Nanghakot og mga kampiyunato ang inilang Sugboanong sharpshooter nga si Roygbiv “Roy” Barro sa iyang pagsalmot og nagkadaiyang practical shooting competitions sa kaulohan sulod sa tulo ka mga buwan.

Ang kalampusan nagsilbeng bunga sa disiplina, determinasyon, ug sakripisyo ni Barro nga mao ang iyang gihimong mga hinagiban sa paghangop ning maong malisod nga misyon.

“Ako lang gi-honor ang gisaad nako sa akong kaugalingon nga mo-stay sa Manila sa dugay-dugay nga panahon,” batbat ni Barro, kinsa sakop sa Laguna-Practical Shooters Group (LAG-PSG) ubos sa pagpangulo ni Grandmaster Alfredo “Jun” Catalan.

Si Barro, kinsa miantos nga mahilayo siya sa iyang pamilya sulod sa pipila ka mga buwan alang ning maong dakong tahas, miingon nga gidawat niya kining usa ka dakong hagit hinungdan nga nagtutok gyud siya’g maayo sa iyang training.

“Ako sab ni pamaagi pag-accept sa challenge nga akong atubangon ang tanang mga pagsulay kay nasayod ko nga dili sayon ang dalan nga akong again,” dugang ni Barro.

“Gusto nako nga inig balik nako sa Cebu, fulfilled kaayo ko nga duna koy nakitang imrovement gikan sa tanan nakong efforts ug sakripisyo.”

Ang kanhi Sportswriters Association of Cebu (SAC) awardee misugod sa iyang kampanya niadtong Hulyo 18, 2021 diin nasulod siya sa Top 3 overall sa Tri-President Cup, nga gidominar ni Bro Tecson, ang standard division king sa Southeast Asia.

Paglabay sa unom ka mga adlaw, ang 21-anyos nga si Barro mikampiyon na sa Bacolor, Pampanga. Iyang gikolekta ang uban niyang mga korona sa Plaridel, Bulacan niadtong Agusto 15, 2021 ug sa Meycauayan City niadtong Agusto 28, 2021.

Naghari na sab si Barro sa usa ka event sa Dasmariñas, Cavite niadtong Septiyembre 11, 2021.

Nakasakmit sab si Barro og first-runner finish sa Lingayen, Pangasinan (Agusto 1), sa Malvar, Batangas (Agusto 21), sa Batangas City (Agusto 22), ug sa Dasmariñas (Agusto 29) ug na-3rd siya sa Batangas (Agusto 30).

“Motivated kaayo ko every competition knowing that I trained hard for it,” batbat ni Barro.

“Ako gyud ihatag akong best effort, time ug focus sa tanan nakong gibuhat. Dunay mga higayon nga bation ko og kakapoy apan i-push gyud nako akong self to the limit to fulfill my promise to God and my family ug makahatag og maayong resulta sa mga Cebuanos.”

Matod ni Barro nga kining dakong kalampusan nakapadasig niya’g samot aron doblehon pa ang iyang paningkamot sa pagkab-ot sa tanan niyang mga pangandoy isip usa ka sharpshooter. (ESL)