Na-diagnosed og cancer ang usa sa labing bantugang babaye nga mga bilyarista sa kalibutan nga si Jeanette “The Black Widow” Lee ug matod sa iyang mga higala, dili na makaabot og usa ka tuig ang kinabuhi niini.

Ang kahimtang ni Lee, 49, gibutyag sa GoFundMe ning bag-uhay lang human ang pamilya ug mga higala niini nipagawas og pamahayag nga adunay stage four ovarian cancer si Lee.

Matod ni Lee nga gisugdan na niya ang proseso sa pagpakigbatok sa iyang sakit ug misaad nga buhaton niya ang tanan aron mapiog kini.

“I intend to bring the same resolve I brought to the billiards table to this fight,” matod ni Lee sa American Poolplayers Association.

Si Lee nagsugod pagduwa og billiard kapin na sa tulo ka mga dekada ang nakalabay ug nahimo siyang labing dominanteng babaye nga magduduwa niadtong dekada 90.

Si Lee gipahiluna sa Billiard Congress of America Hall of Fame niadtong 2013. (ESL)