MOREPRESENTAR na sab sa Pilipinas ang Meralco Bolts alang sa 2019 FIBA Asia Champions Cup nga ipahigayon karong Septiyembre 24-29 sa Bangkok, Thailand.

Kini maoy ikaduhang sunodsunod nga tuig nga mopakita’g aksyon ang Bolts sa kompetisyon nga salmutang og nagkadaiyang basketball teams sa tibuok Asia.

Sa miaging tuig, ang Bolts igo lang milangkat sa ikaupat nga puwesto human kini gipukan sa Korean team SK Knights sa inilugay sa bronze medal.

Motabang sa kampanya sa Bolts ning higayuna mao ang duha ka imports sa Philippine Basketball Association (PBA) nga sila si Allen Durham ug Renaldo Balkman.

Si Durham mao sab ang import sa Bolts sa ilang kampanya sa miaging tuig ning maong kompetisyon.

Gawas sa Meralco, laing tulo ka teams sa PBA nga mao ang San Miguel Beermen, Blackwater Elite, ug TNT KaTropa ang mosalmot og international tournament isip pagpangandam sa ilang kampanya sa umaabot nga PBA Governor’s Cup. (ESL)