Mobalik na’g away si kanhi three-division world champion Filipino Johnriel Casimero karong gabii, Disyembre 3, 2022, batok kang Ryo Akaho sa Paradise City sa Incheon, South Korea.

Ang gitawag og Quadro Alas katapusang niaway niadto pang Agusto 14, 2021 diin nidaog siya batok kang Cuban Guillermo Regondeaux sa ilang World Boxing Organization (WBO) bantamweight title fight sa Carson, California.

Human niini, duha ka mga away ni Casimero ang wala nadayon tungod kay nagproblema siya sa timbang nga maoy hinungdan nga gitangtangan siya og bakus sa WBO.

Naghinamhinam si Casimero ning awaya tungod kay mao kini ang nagsilbeng pultahan aron mosaka pagbalik ang iyang karera.

Matod ni Casimero nga human ning awaya, ipadayon niya ang iyang tinguha nga ikaharong si Japanese superstar Naoya “Monster” Inoue, kinsa usa ka unified bantamweight world champion.

Ang beteranong Filipino boxing analyst Atty. Ed Tolentino nagtuo nga dili maglisod si Casimero batok kang Akaho.

Pasabot ni Tolentino nga bisan mas dako si Akaho apan dako ang bintaha ni Casimero sa abilidad. Si Casimero adunay 31-4, 21KOs nga rekord samtang si Akaho naggunit og 39-2-2, 26KOs nga baraha.