HUMAN sa iyang pagpanghawod sa Central Visayas Regional Athletic Association (CVIRAA) basketball, ang sumosulbong nga basketbolista sa Sugbo nga si LA Casinillo andam nang mohangop sa mas lisod nga pagsuway.

Ang 16 anyos maoy mangulo sa Sacred Heart School-Ateneo de Cebu (SHS-AdC) Magis Eagles sa pagrepresentar sa Central Visayas alang sa Palarong Pambansa sa Davao City nga sugdan karong adlawa.

Matod ni Casinillo, kinsa napiling MVP sa CVIRAA, nga grabe ang ilang paningkamot alang ning maong kompetisyon diin ikaharong nila ang labing maayong Under-17 nga mga basketbolista sa tibuok nasod.

“Recently, ang among practice kay three times a day, wala mi rest day. Dili mi gusto nga moadto as participants lang. Gusto gyud namo nga mo-compete,” matod sa 5’11 combo guard.

“Nindot ni nga challenge para sa akoa. Ako ihatag ang tanan nakong makaya para sa region 7.”

Ang Magis Eagles nakaangkon sa katungod sa pagrepresentar sa rehiyon 7 human nila naangkon ang gold medal sa CVIRAA Meet niadtong Pebrero sa Dumaguete City.

Ang amahan ni Casinillo nga si Leo adunay tambag sa iyang anak.

“Push more. You don’t need to stop. You need to practice more and more. Always be ready to compete and accept the challenges that comes to you,” matod ni Leo, kinsa kanhi varsity player sa De La Salle University sa Manila.

Si Leo maoy nagtukod sa Coach Leo Basketball Academy (CLBA) nga matod niya dako og natabang aron mas mabaid ang abilidad sa iyang bugtong anak. (ESL)