NING pipila na lang ka mga semana sa dili pa sugdan ang training camps sa National Basketball Association (NBA), nagtinguha gihapon ang Cleveland Cavaliers nga maangkon ang serbisyo ni Philadelphia Sixers star Ben Simmons.

Si Simmons, kinsa aduna pa’y nahabiling upat sa iyang lima ka mga tuig nga extension contract sa Sixers nga mokantidad og $177 million, hugot mipadayag nga bisan unsa pa’y mahitabo dili na gyud siya mobalik pa sa sabakan sa Sixers.

Gawas sa Cavaliers, laing team ang interesado usab sa serbisyo sa 6’11” ug no. 1 pick sa 2016 NBA Draft ug kini mao ang Minnesota Timberwolves.

Apan hangtod ning pagsulat, wala pa’y klaro ang tanan hilabi na kay wala mopakita og kooperasyon si Simmons ngadto sa Sixers.

Sa habig sa Cavaliers, adunay hugonhugon nga andam nilang ibaylo bugti ni Simmons ug Shake Milton ang tulo nila ka star players nga sila si Collin Sexton, Ricky Rubio ug Cedi Osman.

Mitumaw usab ang ngan ni Kevin Love apan daw og sa dili interesado ang Sixers sa kontrata ni Love kay wala na nila kinahanglana ang posisyon niini sa team.

Si Sexton gikatakda na usab nga mopirma og laing dakong kontrata sa Cleveland apan nagduda pa ang Cavaliers kon mohaom ba gyud siya sa bag-ong sistema sa team.

Ang Minnesota nangita og ikapares ni Karl-Anthony Towns, kinsa usa sa mga bigmen sa NBA nga taas og porsiyento sa outside shooting apan minus kaayo sila og depensa.

Nalantawan nga ang panagpares ni Towns ug Simmons makabalanse sa opensa ug depensa sa Timberwolves. (JBM)