NAGHINAMHINAM na ang bag-ong naporma nga Casino Ethyl Alcohol Cebu City Sharks nga ipakita ang natad sa Sugbuanong basketball sa ilang kampanya sa Maharlika Pilipinas Basketball League (MPBL) Season 2 nga mosugod karong Hunyo 12.

“Ninety-eight percent of our players are Bisaya,” matod ni team manager Mark Castillo atol sa official launching sa team sa miaging adlaw sa Robinsons Fuente.

Ang Sharks, nga gipanag-iya sa International Pharmaceuticals, Inc. (IPI) magbasi sa Las Piñas ug molarga kini karong Mayo 27 paingon sa Manila aron moduwa og duha ka tune-up games isip tipik sa ilang pagpangandam sa torneyo, nga gitukod ni eight-division world champion boxer Manny Pacquiao.

“We will play Muntinlupa on June 1 for our first tune-up game. There’s no team yet for our second tune-up game,” matod ni coach Gilbert Castillo.

“We can’t say yet how’s the personal conditioning of our players. We will see that once we play the tune-up game. The tune-up game against Muntinlupa will test the physical preparedness of our players.”

Kadaghanan sa mga duwa sa Sharks sa elimination round ipahigayon sa Luzon, hinuon makita kini sa mga Sugbianon sa telebisyon sa ABS-CBN.

Ang mga sakop sa Sharks mao sila si Mark Anthony Abadia, Francisco Arong Jr., Patrick Jan Cabahug, Caesar Ruba Catli, Alfred Codilla, Harold Corter, ug Enrico John Llanto.

Mokompleto sa team mao sila si Jovanie Luz Jr., William Bill Mcaloney Jr., Victor Bongbong Nunez, Rhaffy Ocotbre, Ceasar Ian Ortega, Garciano Puerto Jr., Eric Rodriguez, Jon Dan Salvador, John Abad, Iron Suano, ug Kevin Rey Villafranca. (RSC, ESL)