HANGTOD sa katapusang adlaw sa kompetisyon sa 30th Southeast Asian Games, ang Sugbo padayong nakatampo og gold medal alang sa host Philippines ug ning higayuna gikan sa usa ka nontraditional event – ang eSports.

Sa kinatibuk-an, ang Sugbo nakatunol na og 10 ka gold medals alang sa Pilipinas.

Ang Sibol, nga maoy monicker sa Philippine eSports team, milupig sa Thailand, 3-2 aron angkunon ang gold medal sa Dota II event niadtong Lunes sa gabii, Disyembre 9, 2019 sa Filoil Flying V Centre sa San Juan.

Kadaghanan sa mga sakop sa Sibol nagagikan sa Team Adroit, usa ka all-Cebuano squad nga nakasalmot na og nagkadaiyang mga kompetisyon sa tibuok Asya.

Ang mga sakop sa Team Adroit mao sila si Bryle Jacob “CML Alvizo, Van Jerico “Van” Manalaysay, James Erice Guerra, Jun “Bok” Kanehara, Marvin Salvador “Boomy” Rushton, MC Nicholson Villanueva ug John Anthony “Natsumi” Vargas.

Ang coach sa team nga si Pao “Sandata” Bago gikan sab sa Sugbo. Ang Sibol unang nakalangkat og gold medal sa Mobile Legends: Bang Bang niadtong Dominggo, Disyembre 8, 2019. Unya kagahapon, padayon ang pagpanghawod sa Sibol ug milangkat na sab kini’g laing gold medal gikan sa StarCraft 2 event diin gilupig sa mga Pinoy ang Singapore, 4-1.

Ang eSports karon lang gidugang sa mga event nga gikombatihan sa matag duha ka mga tuig nga kompetisyon.

Ning pagsuwat, ang Pilipinas nakatigom na og makasaysayong 137 ka gold medals, 102 ka mga silver ug 107 ka mga bronze.

Ang Thailand mao na karon ang naglingkod sa ikaduhang dapit nga adunay 84-91-102 medal tally samtang ningdakin-as sa ikatulo ang Vietnam nga adunay 80-79-94 medal tally.

Naa sa ikaupat ang Indonesia nga adunay 69-76-102 haul samtang ikalima ang kanhi defending overall champion Malaysia nga adunay 51-52-67 tally.

Karong adlawa, opisyal nga ideklarar ang Pilipinas isip bag-ong overall champion atol sa gipangandaman og insakto nga closing ceremony sa New Clark Athletic Stadium sa Capas Tarlac. (RSC, ESL)