NAHILAKIP ang Cebuana weightlifter nga si Eileen Ann Ando sa mga nakit-an og potensyal nga makatabang sa kampanya sa Pilipinas sa 2020 Tokyo Olympics.

Ang nag-unang weightlifters sa nasod ug Olympians nga sila si Hidilyn Diaz ug Nestor Colonia mao ang mangulo sa Philippine weightlifting team apan alang sa Samahang Weightlifting ng Pilipinas (SWP), makatabang og dako ang batan-on nilang mga sakop.

Nagkanayon si SWP President Monico Puentevella nga daghan sila og talento nga puwedeng makatabang nila ni Diaz ug Colonia sa pagrepresentar sa nasod alang sa matag upat ka mga tuig nga kompetisyon.

Gawas kang Ando, naa sab si Vanessa Sarno, usa ka 16 anyos nga nakadaog og duha ka gold medals sa Asian Junior ug Youth Championships sa Pyongyang sa miaging semana.

Ang uban nga gituohang makahatag og suporta nila ni Diaz ug Colonia mao sila si Kristel Macrohon ug Margaret Colonia.

“We want to become the sports association with the largest number of Olympic delegates,” matod ni Puentevella, kinsa mao sab ang tsirman sa Philippine Olympic Committee (POC) ug komisyoner sa Philippine Sports Commission (PSC).

“Like Hidilyn when she competed in the Beijing Olympics in 2008, we are also exposing our young players to international competitions as early as 16 years old,” dugang ni Puentevella.

“We are preparing them early and want them to qualify in the Tokyo Olympics so that by 2024, they already have the experience to become Olympic medalists.”

Aron maka-qualify sa Olympics, ang mga atleta kinahanglang makapakita og maayong performances sa unom ka qualifying tournaments. (RSC, PR)