MOBANGON og suway gikan sa sunodsunod nga pagkapandol ang Southwestern University (SWU-Phinma) Cobras sa ilang pagpakigbatok sa University of San Jose Recoletos (USJ-R) Jaguars sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.

Ang Cobras, nga usa unta sa sayong mga inilog sa torneyo gumikan sa ilang pagkampiyon sa Partner’s Cup, nasugamak sa kapildihan sa miagi nilang duha ka mga duwa.

Nabawsan ang Cobras sa ilang gibiktima sa Partner’s Cup finals nga mao ang University of the Visayas (UV) Green Lancers, 71-66, niadtong Septiyembre 22.

Unya sa wala damha, nakatilaw og makapakurat nga kapildihan ang Cobras batok sa nagsalimoang nga Cebu Institute of Technology University (CITU) Wildcats, 62-67, niadtong Enero 28.

Ang Cobras natagak sa 3-2 nga rekord.

Kon buot hunahunaon, mas grabe og kasinatian ang Jaguars kumpara sa Cobras.

Human gisugdan sa Jaguars ang torneyo og kadaugan batok sa Wildcats, 72-67, niadtong Agusto 31, hayan nasugamak sila sa upat ka sunodsunod nga kapildihan batok sa University of San Carlos (USC) Warriors, 55-62, University of Cebu (UC) Webmasters, 64-81, UV Green Lancers, 56-76, ug University of Southern Philippines Foundation (USPF) Panthers, 69-78, OT).

Basi sa mga kasinatian sa duha ka mga kampo, dili ikalimod nga makonsiderar gihapon nga inilog ang Cobras batok sa Jaguars.

Apan wala kini nagpasabot nga segurado na ang Cobras nga modaog, sama na lang sa nahitabo sa ilang pagpakigbatok sa Wildcats.

Sa premirong duwa, magsangka ang Cebu Eastern College (CEC) Dragons ug UV Baby Green Lancers alang sa high school

division.

Ang Baby Green Lancers adunay 3-1 nga rekord samtang ang Dragons naghupot og 3-3 nga baraha. (ESL)