Mga duwa karon:

8:30 am - SHS-AdC batok USC (12-U for 3rd)

10:00 am - UV batok CEC (12-U finals)

1:00 pm - UV batok USPF (High school semis)

2:30 pm - UC batok USJ-R (High school semis)

4:00 pm - USC batok USJ-R (College semis)

5:30 pm - UV batok UC (College semis)

HUMAN sa usa ka semana nga pahuway, masipang buto ang mosugat sa pagbalik sa aksyon sa CESAFI basketball karong adlawa gumikan kay magsugod na ang semi-final round sa high school ug college division sa Cebu Coliseum.

Magsangka ang back-to-back champions ug No.2 seed UV Green Lancers ug No.3 UC Webmasters human sa engkuwentro sa No.1 squad USJ-R Jaguars batok No.4 USC Warriors.

Isip benepisyo sa ilang pagkasulod sa top 2, ang Jaguars ni coach Leodie Garcia ug Green Lancers ni coach Gary Cortes parehong naggunit og twice-to-beat nga bintaha ning mga kombatiha.

Human sa elimination, ang Jaguars ug Green Lancers natanggong sa three-way tie sa 9-3 nga rekord alang sa ibabaw nga kauban ang Webmasters.

Gibuak ang maong panagtabla pinaagi sa quotient diin mingpatigbabaw ang Jaguars sa labing unang higayon sa kasaysayan sa liga, ningdakin-as sa ikaduha ang Green Lancers ug ikatulo ang Webmasters.

Dili ikalimod nga inilog ang Jaguars ug Green Lancers ning mga sangkaa apan wala pa’y kaseguroan ang tanan tungod kay parehong adunay ikabuga ang Warriors ni coach Bong Abad ug Webmasters ni coach Raul “Yayoy” Alcoseba.

Sa premirong duwa karong hapon, magsangka ang No.1 UV Baby Baby Green Lancers batok No.4 USPF Baby Panthers unya mosunod ang kombati sa No.2 UC Baby Webmasters ug No.3 USJ-R Baby Jaguars alang sa high school division.

Naggunit og twice-to-beat nga bintaha ang Baby Green Lancers ug Baby Webmasters ning mga sangkaa isip benepisyo sab sa ilang pagsulod sa top 2.

Sa laing bahin, ipahigayon sugod karong alas 8:30 sa buntag ang knockout games sa inilugay sa ikatulong dapit ug championship sa 12-under division. ESL