Miposte og pito ka sunodsunod nga kadaogan ang Los Angeles Clippers aron mahimong usa sa pinakainit nga teams sa NBA regular season.

Bag-o nilang biktima mao ang Minnesota Timberwolves nga ilang gilat-an, 129-102, kagahapon sa NBA regular season game didto sa Los Angeles, California.

Wa makalabok ang pambato sa Minnesota nga si Karl-Anthony Towns kay igo lang kini mitali’g utso puntos sa 3-of-11 shooting. Mao kini ang unang single-digit scoring ni Towns sukad tuig 2018.

Samtang bugnaw ang kamot sa superstar sa Timberwolves, nagdilaab pud ang mga pambato sa Clippers nga gipangulohan ni All-Star guard Paul George nga adunay 23 puntos ug Reggie Jackson nga mitali’g 21 puntos.

Sigon ni Clippers head coach Tyronn Lue nga epektibo gyud ang ilang game plan kang Towns.

“We’re fronting him on the post and coming with the low man,” matod niya. “We just try to switch everything so he can’t get shots off. We just want to slow him down.”

Ang Clippers milista pud og 35 ka assists nga maoy nagpakita sa ka maayo sa ilang teamwork.

Si Anthony Edwards maoy nangulo sa Minnesota sa iyang 21 puntos ug siyam ka rebounds, samtang si D’Angelo Russell ug Jaden McDaniels adunay 15 puntos.

Si Towns maoy leading scorer Timberwolves sa ilang duwa batok sa Lakers, apan wa ni kaporma batok Clippers.