DOBLING selebrasyon maoy gisaulog sa host Pinamungajan sa opening day sa 2019 Congressman Pablo John Garcia (PJ) Cup basketball and volleyball tournament nga gipahigayon niadtong Dominggo sa Pinamungajan Sports Complex.

Unang mipupo og kadaugan ang Pinamungajan basketball team human kini mipukan sa Asturias, 69-66, sa usa ka kulbahinam nga duwa.

Nagpulipuli ang duha sa pagsakmit sa labaw ug dihay pipila higayon sa naghinapos nga mga minutos nga makatabla unta ang Asturias apan napakyas kini sa ilang tulo ka posisyon.

Hinuon, sukwahi ang nasinati sa volleyball event women’s tungod kay yano ra kaayong gidominar sa Pinamungajan ang Asturias, 2-0.

Si Cebu Governor Gwen Garcia kinsa maoy pinasidunggan dinapit sa maong kalihukan, mapasalamaton kaayo sa iyang manghod sa pag-organisar sa maong kalihukan tungod kay mao kini nakahatag ug kahigayonan sa mga opisyal sa lungsod ug kabarangayan sa ikatulong distrito nga magkahimamat ug magkaila-ila sa matag usa pinaagi sa sports.

Ang maong kompetisyon alang lang niadtong napiling barangay ug municipal officials sa maong distrito.

Human masinati ang kainit sulod sa gym, ang gobernador mipasalig og industrial fans nga ibutang sa complex, butang nga gikalipay ug gikahimuot ni Mayor Glenn Baricuatro.

Lakip usab sa mga mitambong usab sa kalihukan si Barili Mayor Marlon Garcia uban sa iyang bise nga si Julie Flores, Balamban Vice Mayor Alfie Binghay, Aloguinsan Mayor Iggie Moreno uban sa iyang bise-mayor, Asturias Mayor Jose Antonio Pintor, Toledo City Mayor Marjorie Perales ug Bise Mayor Jay B. Sigue ug representatives sa lungsod sa Tuburan.

Ang kampiyon sa matag event, makadawat og P200,000 cash, samtang ang runner-up adunay gahin nga P150,000. Ang third placer molabni sa P100,000 cash samtang P60,000 nga consolation prize sa tanang misalmot.

Ang torneyo mosunod sa home-and-away format.

Si Congressman ug deputy speaker PJ Garcia, kinsa mahiligon usab sa sports, mibutyag nga sa iyang paghibalik isip representante sa 3rd district, daghan pa unyang mga natad sa paugnat sa kusog ang iyang mapahigayon sa distrito. (JBM)