PILA lang ka oras sa wala pa sugdi ang purse bid, ang Top Rank ug Premier Boxing Champions (PBC) nagkasabot gilayon alang sa mandatory defense ni World Boxing Organization (WBO) welterweight champion Terence Crawford batok ni Shawn Porter.

Ang duha gikatakdang magsangka karong Nobiyembre 20, 2021 sa Mandalay Bay sa Las Vegas. Kining maong panagsangka gihulagway nga usa sa gikahinaman karong tuiga.

Si Crawford (37-0, 28 KOs) mosaka ibabaw sa ring nga taas ang moral tungod sa iyang pound-for-pound skills apan wa kini makaaway og dekalidad nga mga kontra sukad gibuhian niini ang iyang titulo sa super lightweight division aron mosaka sa 147 lbs.

Samtang si Porter (31-3-1, 17 KO) perming makakontra og may kalidad nga mga kaatbang.

Hinuon ang duha, gihulagway nga adunay kapabilidad nga motumba sa matag usa. Taas-taas hinuon ang panahon nga wala makaaway ang duha. (JBM)