NANGLANTAW na si Stephen Curry sa laing hagit sa iyang basketball career, lakip na niini ang pagduwa sa US sa umaabot nga Tokyo Olympics sunod tuig.

Kini human sa pipila pa lang ka semana nga naputol ang dominasyon sa Golden State Warriors sa NBA Finals human sila mapukan sa Toronto Raptors.

Si Curry miabot sa Tokyo niadtong Dominggo ug naghinamhinam na kini nga makaduwa sa Olympics ug ingon man makigsangka sa mga bag-ong subang sa Japan.

Ang US maoy nakalabni sa gold medal sa niaging tulo ka Olympics ug sa gihapon maoy top favorite sa Tokyo diin si Curry makigkauban nila ni LeBron James ug Kawhi Leonard sa gihulagwayng laing bersiyon sa US Dream Team.

Wa makaduwa si Curry sa niaging Rio Olympics tungod sa angol sa iyang tikod ug tuhod.

“I know the energy here is going to be amazing,” matod ni Curry. “I haven’t played in the Olympics before. I’ve played in two World Cup teams so I’ve had the experience of representing my country playing for the national team. But the Olympics, from everybody that I’ve talked to that’s played, there’s no comparison to that experience.”

Ang pagbisita ni Curry sa Tokyo maoy kabahin sa iyang youth basketball clinic. (JBM)