NAKAPUGOS og deciding Game 5 ang Davao Occidental Tigers human nila gipangkawras ang host San Juan Knights, 77-66, sa Game 4 sa National finals series sa Maharlika Pilipinas Basketball League (MPBL) sa FilOil Flying V Centre sa Manila.

Ang Tigers naggukod og 10 ka mga puntos, 57-47, sa nahabiling siyam ka mga minutos dihang kalit nga nanginit ang mga kamot sa nahimo nilang bayani nga si Billy Ray Robles.

Sa pagpangulo ni Robles, ningkamang ang Tigers gikan ning maong pagkalubong aron pakuratan ang Knights.

Ning maong paggukod sa Tigers gimugna ni Robles ang 12 sa iyang kinatibuk-ang 22 puntos.

Nakalangkat sab og 18 ka rebounds si Robles.

“Billy played big and then the key there is we executed on both ends of the floor,” asoy ni Tigers coach Don Dulay.

Ninghatag og saktong suporta kang Robles mao sila si Joseph Terso ug Emman Calo nga nagkumboya og 19 puntos. (ESL)