GIBUTYAG ni Brgy. Ginebra Gin Kings forward Joe Devance nga naghunahuna na siya sa iyang kamatayon dihang nataptan siya sa Covid-19 ug wala siya magdahom nga maalim ra siya gikan sa hulga sa pandemya.

Pinaagi sa iyang personal account sa YouTube account, gisaysay ni Devance ang iyang kasinatian sa pagpakigbatok sa Covid-19.

Gipabuhagay ni Devance nga naghatag na siya og mensahe sa pagpanamilit ngadto sa iyang asawa gumikan sa iyang pagtuo nga mopanaw na siya sa laing kalibutan.

“Last night was rough. I didn’t think I was going to make it out alive. I even sent a message to my wife cause I thought I was gonna die,” batbat pa ni Devance sa usa ka video nga iyang gi-share sa YouTube niadtong Mayo 8, 2021.

Si Devance mao ang labing ulahing magduduwa sa Philippine Basketball Association (PBA) nga mibutyag sa social media nga nataptan sila sa Covid-19 ug mipaambit sa ilang kasinatian.

Matod ni Devance nga gikahimamat niya ang usa sa iyang mga higala nga nataptan sa Covid-19 ug nagpa-swab test dayon siya human niini.

Asoy sa 6’7” Fil-Am nga nakasinati siya og semtomas nga pagpanakit sa kalawasan, ubo, pagpanugnaw ug labad sa ulo sulod sa ubay-ubay nga mga adlaw.

Sa iyang video sa YouTube, gipakita ni Devance ang iyang bedside medications nga naglakip og zinc capsules, vitamin C, vitamin D, Tylenol, ug melatonin nga maoy iyang tumaron aron makatulog siya matag gabii.

Gawas sa iyang mga tambal, batbat ni Devance nisubay sab siya og steam therapy gamit ang sauna sa iyang panimalay.

Sa kasamtangan, padayon pang naka-quarantine si Devance sa iyang panimalay ug malipayon niyang gisaysay nga sa iyang tan-aw, paingon na siyang hingpit nga maalim.

“I had a lot of movement today. I thought I was gonna die the last few days, but I’m back,” asoy sa PBA 11-time champion.

“I still had to quarantine, my body still aches a little bit but for the most part, I feel a little bit better.” (ESL)