NAKALANGKAT og gold medal ang Olympian nga si Hidilyn Diaz sa iyang unang online weightlifting competition sa Eleiko Emil International Lifters Tournament niadtong Hulyo 24 to 25.

Ang 2016 Rio Olympics silver medalist ug numero unong pambato sa Pilipinas para sa Tokyo Olympics mi dominar sa 59kg division aron hatagan og dungog ang nasod taliwala sa kalisod tungod sa pandemiya.

Si Diaz mipusti og total lift nga 216kgs gikan sa 95kgs sa snatch ug 121kgs sa clean and jerk aron aswaton ang titulo sa unang online tournament sa weightlifting human ma kanselar ang tanang majorit events tungod sa coronavirus pandemic.

Gilupig ni Diaz ang Australiana nga si Fatima Yakubu (183kgs) ug Johanni Taljaard (188kgs) sa South Africa ug ang laing 47 ka weightlifters sa women’s 59kg. division. Ang resulta sa online competition gipagawas niadtong Huwebes sa gabii, Hulyo 30.

Si Diaz, kasamtangang women’s Asian Games (53kg) and Southeast Asian Games (55kg) champion, anaa karon sa Kuala Lumpur, Malaysia diin siya ga training sukad niadtong Pebrero.

Ang lumad nga taga Zamboanga anaa karon sa ikalima nga luna sa International Weightlifting Federation world rankings sa women’s 55kg division. Naninguha si Diaz nga makasulod sa Tokyo Olympics nga nasibog sunod tuig.

Si Diaz adunay 3,717.0982 points ug gasunod nila Chinese weightlifters Jiang Huihua (4,667.8878), Liao Qiuyun (4,288.9622), Zhang Wangqiong (4,212.6639) ug Li Yajun (4,099.0223) sa world ranking.

Moduwa unta si Diaz sa iyang final nga Olympic Qualifying Tournament apan nakanselar ang tanang physical weightlifting event tungod sa coronavirus. (RSC)