Gibuak ni Leigh Christian Dixon ang iyang kaugalingong season-high nga 32 ka rebounds sa dihang gilubong sa Bad Boys Wingz-2007 ang Marjaztin Glass Trading & Construction-2008, 81-62, sa nagpadayon nga 25th Sacred Heart Ateneo Alumni Basketball Athletic Association (SHAABAA) basketball tournament niadtong Dominggo didto sa Magis Eagles Arena sa Ateneo de Cebu campus sa Mandaue City.

Ning higayona, si Dixon milangkat og 37 ka rebounds gawas sa iyang 27 puntos aron pangulohan ang Batch 2007 ngadto sa ilang ikaduhang sunodsunod nga kadaugan sa Division B.

Kon kahinumdoman, sa ilang unang duwa niadtong Agusto 7, 2022 si Dixon miposte og 32 ka rebounds ug 21 puntos sa ilang makutas nga kadaugan, 56-54, batok sa Batch 2009.

Tungod ning iyang talagsaong gipakita, ang maskulado nga may igong gitas-on ug gidak-on nga Dixon mao na karon ang nasentro sa atraksiyon sa lega.

Di lang sa puntos ug sa rebounds, kon dili nakapakatap usab kini siya og upat ka assists, duha ka steals ug duha ka blocks.

Double-figure usab ang nahimo sa iyang kauban nga si Karl Antonius De Pio nga may 14 puntos ug 15 ka rebounds.

Sayong miarangkada ang Batch 2007 ug miposte gilayon kini og 21 puntos nga labaw, 48-27, pagkatapos sa first half.

Apan nahudlat kini sa makadiyot human mopabuhagay og dakong rally sila si Ed Bonphyl Macasaling ug Ricardo Pepito sa third quarter aron pahakan ang bintaha, 53-59.

Hinuon, human sa timeout ni coach Enrico Llanto, ang 2008 maampingon nga naghugpong og balik aron, sa makausa pa, inaton na usab ang ilang labaw.

Ang kapildihan maoy nagduot sa 2008 ngadto sa ikaupat nga pagkapukan.

Sa laing duwa, gilampornas usab sa Batch 1998 ang Batch 1992, 57-38. Si Michael Stephen Lim mihagdaw og 19 puntos ug 13 puntos samtang nangulo si Benedict Chua nga may 11 puntos alang sa ikaduhang pagkahagsa sa Batch 1992.

Hinay nga nakasugod ang '98 human kini mabiyai sa first quarter, 8-15, apan diha na misugod pagpakita sa ilang dominasyon sa third quarter.

Giposte usab sa Batch 2000 ang ilang ikatulong sunodsunod nga daog pinaagi sa pagbuntog sa Batch 1996, 79-69, sa Division A.

Si Dave Michael Ting mitali og 22 puntos, Sergs Gobui 16 puntos ug tag 10 puntos matag usa ang natampo ila ni Peirre Milla ug Johannes Chua.

Nagpadayon usab nga limpiyo ang baraha sa Batch 2001 (3-0) human nila patapsingi ang Batch 1997, 61-56, sa Division A.

Sama sa naandan, si Jason Arquisola maoy top scorer sa Batch 2001 pinaagi sa iyang 11 puntos ug unom ka rebounds diin mitimang usab kaniya si Mark Jeffrey Hing nga may 10 puntos.

Si Wendell Ryan Ong mipakli og 9 puntos apan aduna kini 13 ka rebounds.

Samtang ang wa pay daog nga Batch 1997 (0-2) nakakuha og 17 puntos gikan ni Roderick Mangubat ug 15 puntos ug 10 ka rebounds usab gikan ni Mark Sy. (JBM )