NAHILAKIP si four division champion Nonito “Filipino Flash” Donaire Jr. sa listahan sa mga nominado alang sa 2021 Fighter of the Year award sa prestihiyusong Boxing Writers Association of America (BWAA).

Ang asawa ni Donaire nga si Rachel naapil sab sa mga nominado alang sa Manager of the Year award.

Si Donaire, kinsa maoy kasamtangang World Boxing Council (WBC) bantamweight champion, nakig-uban nila ni boxing superstar ug undisputed middleweight champion Mexican Saul “Canelo” Alvarez, super bantamweight champion Stephen Fulton Jr., heavyweight champion Tyson Fury, super lightweight champion Josh Taylor, ug heavyweight champion Oleksandr Usyk.

Taliwala sa iyang edad nga 38, gipakita ni Donaire nga kaya pa niyang maghari sa iyang timbang ug wala pa siya'y plano nga moretiro.